السلام عليكم ورحمة الله وبركاتة
كل ساعة انذبح من عرست لليوم
وكل ساعة انذبح بجدام تذكارك
بعد ماكفرتني المن جاي تقرالي وترتل سورة اعذارك
وكع وكت البرد وادفه بيك الغير
وما الحك بعد واستانس بنارك
يالمثل النخل شامخ شجاك شبيك
خليت الغريب يلوذ باكتارك
مرات النخل من يصعد ينباك
وانت بيوم عرسك كلي شخبارك
صدك تمرك خلص لمن اجاك الليل
وصدك سعفك خدر وانطيت جمارك
دليته اعله روحك ماتعب وياك
ما دور عليك وداخ فجارك
احجيلي بعد بهالغيبة كلي شصار
واحجيلك اسراري وبيه نتشارك
لان تدري كبل كلي اني اصير اضماد
اذا شريان صوتك ينزف اسرارك
صغت روحي جرف حد ما حضنتك ماي
وابقه لاخر نفس بالروح تيارك
يا اعذب نهر تعله اعله جرفك ليش
تره الناعور غشك لمن اختارك
واعرفك فكرت ظنك تلوح الغيم
دشوف لوين وصلت روحة افكارك
ذنبك امنت من شالك الناعور
اورد اردود بيك وعالجرف دارك
وما دامك اجيت وتنشد على الحال
بعيونك تعال وشوف اثارك
كل ساعة انذبح من عرست لليوم
وكل ساعة انذبح بجداك تذكارك
اتمنى ان القصيدة تنال اعجابكم منتظر الردود من الجميع
مع التقدير
الجمعة أبريل 18, 2008 1:19 pm
